Snemma árs var Starfsmannaráð Ósa sett á laggirnar. Ráðið hittist reglulega og eiga þar sæti bæði stjórnendur og starfsmenn og er megintilgangur þess að vera vettvangur fyrir umræður og skoðanaskipti milli stjórnenda og starfsmanna. Ráðið fjallar um ýmis málefni og kemur sjónarmiðum á framfæri er tengjast hagsmunum starfsmanna, s.s. starfsumhverfið, félagsstarfið, viðburði, fræðslu, þjálfun, og stefnur mannauðs.

Starfsánægja er einn af mikilvægustu þáttum hvers vinnustaðar og því mikilvægt að mæla og fylgjast með upplifun starfsfólks á eigin störfum, starfsumhverfi og líðan á vinnustað. Í okkar huga eru mælingar sem þessar afar mikilvægt tól, sér í lagi á tímum breytinga, þar sem starfsfólk getur nýtt sér könnunina sem rödd til að koma ábendingum hratt og auðveldlega á framfæri. Niðurstöðurnar eru svo kynntar starfsfólki og nýttar sem tækifæri til umbóta.

Í apríl var mannauðsmælingin í fyrsta skipti send út á alla starfsmenn samstæðunnar. Um 83% starfsfólks tók þátt í mælingunni og kom hún afar vel út fyrir heildina, en heildarárangur mældist í tölum 4,36 af 5 mögulegum sem er besti árangur síðan við hófum starfsánægjumælingar. Niðurstöðurnar sýna að starfsfólk okkar er almennt ánægt í vinnunni, það upplifir sig vera þátttakendur í árangursríkri liðsheild og getur mælt með vinnustaðnum við vini sína.

Það er okkar reynsla að reglulegar mannauðsmælingar hjálpi til við að auka virkni starfsfólks og styðji við færni stjórnenda en þetta eru lykilþættir í að viðhalda góðum starfsanda og draga úr starfsmannaveltu.

Gaman er að segja frá því að vorið 2022 fengu Ósar og dótturfélög svefnvottun eftir skimun sem framkvæmd var með spurningalistum frá Betri svefn og beindust spurningarnar að lengd svefns og gæðum. Þeim starfsmönnum sem greindust með svefnvanda bauðst í framhaldinu ráðgjöf og meðferð eftir þðrfum og var starfsfólki með þessu framtaki gert ljóst mikilvægi þess að setja svefn í forgrunn í sínu lífi.

Nýtt þjónustuteymi „Miðjan“ var stofnað innan Mannauðssviðs um haustið. Lykilverkefni þjónustuteymis er að stuðla að líflegum starfsanda og vinnustaðamenningu með stuðningi við stjórnendur og starfsmenn, skipulagningu viðburða og funda og jákvæðri innri markaðssetningu. Þar fer einnig fram á einum stað símsvörun og móttaka gesta, aðstoð við ráðningar, móttöku nýrra starfsmanna, ferðalög og gjafir svo eitthvað sé nefnt. Teymið er staðsett í hjarta fyrirtækisins og hafa allir starfsmenn aðgang að því.

Á síðari hluta ársins var sérstök áhersla lögð á fræðslu og þjálfun starfsmanna. Metnaðarfull fræðsludagskrá var kynnt um haustið sem fól m.a. í sér sértæk námskeið fyrir skilgreinda hópa og opin námskeið eða fyrirlestra þar sem öllum starfsmönnum bauðst þátttaka. Um haustið var lagt af stað í tvö stór þjálfunarverkefni, annars vegar leiðtogaþjálfun fyrir alla stjórnendur samstæðunnar og hins vegar söluþjálfun fyrir viðskiptastjóra lyfja og heilbrigðisvara. Hver einasti starfsmaður fékk boð í þjálfun af einhverju tagi og auk þess voru reglulega fræðsla og fyrirlestrar, með áherslu á heilsu, heilbrigði og forvarnir. Þegar allt er tekið saman kemur í ljós að 90% starfsmanna tóku þátt í fræðslustarfi með einum eða öðrum hætti.

Einnig var áhersla á kynningar á deildum og sviðum, hvaða starfsemi fer þar fram og vöruframboð kynnt en starfsmenn hafa mikið kallað eftir því að fá betri innsýn í störf hvert annars og var m.a. komið til móts við það með þessum hætti.

Workplace var virkjað til muna á árinu og gegnir nú afar mikilvægu hlutverki í miðlun efnis og upplýsinga um heilsueflingu og hreyfingu starfsmanna, fræðslu og þjálfun og hverju því sem gott er fyrir starfsfólk að vita og fylgjast með. Þar fara einnig fram kynningar á nýjum vörum og þjónustu, tilkynningar um nýja starfsmenn og ýmsir leikir og keppnir eru þar haldnir enda starfsfólk upp til hópa mikið keppnisfólk! Þetta hefur gefist vel og mikil virkni og endurgjöf er á miðlinum sem aftur gefur tilfinningu um góðan starfsanda og áhuga fólks hvert á öðru og störfum hvers annars.

Á þeim nótum má segja að árið 2022 hafi fyrst og fremst verið skemmtilegt og gefandi, uppfullt af nýjungum og tækifærum og er óhætt að segja að virkni og þátttaka starfsfólks hafi aldrei verið meiri en nú.