Stjórn Ósa og dótturfélaga gerir sér grein fyrir auknum kröfum sem gerðar eru til fyrirtækja á sviði ábyrgðar gagnvart samfélaginu. Stjórnin leggur því áherslu á heilbrigða stjórnarhætti og að þróa þá stöðugt og styrkja enda leggja þeir grunninn að ábyrgri stjórnun, vandaðri ákvarðanatöku og traustum samskiptum.

Stjórnarhættir samstæðunnar kveða á um hvernig innra skipulag stuðlar að virkri og heilbrigðri stjórnun með markmið samstæðunnar að leiðarljósi. Við viljum hafa áhrif á samfélagið, þ.m.t. starfsmenn samstæðunnar, og stuðla að því að einstaklingar geti viðhaldið heilsu og vellíðan og bætt lífsgæði sín til framtíðar. Stjórnarhættir samstæðunnar taka mið af þessum markmiðum og endurspeglast í heilsutengdum áherslum þegar kemur að stefnumótun, ákvarðanatöku, markmiðasetningu og menningu jafnt í ytra sem og innra starfi.

Starfsemi Ósa er á ýmsa vegu háð ytri aðstæðum og má þar nefna þann veigamikla áhrifaþátt að stór hluti hennar liggur innan skilgreinds ramma heilbrigðiskerfisins. Starfsemin er þannig vörðuð lögum, reglugerðum og opinberu eftirliti sem kallar á vönduð vinnubrögð í hvívetna.  Heilbrigðir stjórnarhættir fela í sér áhættustýringu og eftirlit. Því er lögð rík áhersla á heildstæða áhættustjórnun og virkt gæðaeftirlit sem hluta af daglegum rekstri.

Evrópa hefur mótað nýjar leikreglur í málefnum net- og upplýsingaöryggis sem við hjá Ósum höfum umbreytt í stefnu sem við trúum að muni skila samstæðunni raunverulegum árangri til framtíðar.

Breytt landslag gerir nú ríkari kröfur á mörgum sviðum til fyrirtækja að hafa samfélagslega góð áhrif í gegnum aðfangakeðju sína. Við hjá Ósum viljum sýna ábyrgð í verki og höfum sett okkur stefnu um val á samstarfsaðilum sem starfa eftir sömu gildum og samstæðan. Stefnunni til stuðnings höfum við útbúið siðareglur fyrir samstarfsaðila okkar og sett lágmarksviðmið um þær öryggiskröfur sem aðilar sem þjónusta samstæðuna um rekstur á upplýsingakerfum þurfa að uppfylla. Með þessu er ætlun okkar að gefa góða mynd af því til hvers við ætlumst af okkar samstarfsaðilum.

Með því að gera skýrar kröfur til okkar sjálfra sem og til samstarfsaðila okkar viljum við hafa jákvæð áhrif á aðfangakeðjuna og stuðla þannig enn frekar að samfélagslegri ábyrgð okkar í því samhengi.

Við gerum okkur grein fyrir því að upplýsingar og gögn sem starfsfólk vinnur með ásamt kerfum, netum og öðrum auðlindum eru ein mikilvægustu rekstrarlegu verðmæti samstæðunnar. Á árinu 2024 var innleiðingu á Sharepoint lokið og stór skref tekin við innleiðingu á CRM-kerfi, auk fleiri umfangsmikilla umbótaverkefna.

Stjórnarhættir samstæðunnar miða að því að skapa tækifæri og svigrúm fyrir starfsfólk til að vaxa og dafna í lífi og starfi og því er lögð áhersla á að bjóða margvíslega fræðslu og þjálfun sem hentar fjölbreyttum hópi starfsfólks.