Meginmarkmið starfsemi Ósa og dótturfélaga er að auka lífsgæði einstaklinga og stuðla að bættri heilsu og vellíðan landsmanna. Það gerum við með öflugu framboði lyfja, lækningatækja og heilsueflandi vara og að sinna víðtækri vörustjórnunar- og dreifingarþjónustu fyrir heilbrigðisgeirann. Umhverfisþættir geta haft á áhrif á heilsu fólks og því leggjum við einnig ríka áherslu á að lágmarka umhverfisáhrif þegar kemur að starfsemi samstæðunnar í allri okkar virðiskeðju.

Umhverfisstefna Ósa og dótturfélaga

Ósar og dótturfélögin hafa sett sér sameiginlega umhverfisstefnu. Innihald hennar, markmiðasetning og árangursmat eru hluti af heildarstefnu Ósa og dótturfélaga. Umhverfisstefnan nær til samstæðunnar í heild og skal vera leiðbeinandi fyrir félögin, stjórnendur og starfsfólk. Umhverfisstefnan nær til þess hvernig Ósar og dótturfélögin, saman og hvert fyrir sig, geta lagt sín lóð á vogarskálarnar til betra og heilbrigðara samfélags og umhverfis, samhliða að tryggja heilbrigðan rekstur.

Icepharma og Parlogis gegna lykilhlutverki í að tryggja landsmönnum aðgang að lyfjum og heilbrigðisvörum, með dreifingu um allt land til stofnana, apóteka og fagaðila.

Stærstur hluti samstarfsaðila eru alþjóðlegir framleiðendur sem fylgja ströngum umhverfiskröfum og eru oft með vottað umhverfisstjórnunarkerfi, s.s. ISO 14001. Þeir leggja áherslu á ábyrga vöruþróun, sjálfbæra starfsemi og val á samstarfsaðilum með umhverfissjónarmið að leiðarljósi.

Til að tryggja keðjuábyrgð fara framleiðendur og birgjar reglulega yfir starfsemi Icepharma og Parlogis og krefjast þess að félögin geri sambærilegar kröfur til sinna samstarfsaðila.

Ósar og dótturfélög hafa sett skýrar siðareglur um umhverfismál og áskilja sér rétt til úttekta á samstarfsaðilum til að tryggja gæði og ábyrgð í virðiskeðjunni.

Flutningur lyfja og lækningatækja fer einungis fram með samþykktum flutningsaðilum. Parlogis aðstoðar framleiðendur við val á flutningsleiðum, bæði erlendis og innanlands, með áherslu á að draga úr kolefnislosun í samræmi við stefnu framleiðenda.

Þegar Icepharma eða Parlogis bera ábyrgð á flutningum er lögð áhersla á skilvirkni og lágmörkun á eldsneytisnotkun. Parlogis er í samstarfi við Jónar Transport, sem sérhæfir sig í flutningi viðkvæmra vara með bílum sem uppfylla öll öryggis- og umhverfisskilyrði. Bílstjórar eru með ADR réttindi og GDP vottun. Jónar Transport er í eigu Samskipa sem starfa samkvæmt viðurkenndri umhverfisstefnu.

Skilvirkar flutningsleiðir sem draga úr orkunotkun

Daglega eru afgreiddar yfir 700 pantanir úr vöruhúsum Parlogis. Dreifing vara úr vöruhúsum Parlogis á höfuðborgarsvæðinu fer í gegnum verktaka sem eru sérstaklega ráðnir til verksins. Flutningsleiðir eru valdar með það að leiðarljósi að hámarka skilvirkni og draga úr orkunotkun. Allir bílar eru hitastýrðir og mikil áhersla er lögð á árlega þjálfun í öllum verkferlum. Starfsaldur bílstjóra er almennt hár, sem tryggir að um sé að ræða vel þjálfaða og reynda ökumenn.

Íslandspóstur sér um flutning vara frá Parlogis á landsbyggðina og starfa eftir umhverfis- og loftlagsstefnu og er með aðgerðaáætlun henni til stuðnings.

Flokkun hefur verið í forgangi hjá samstæðunni undanfarin ár. Fyrir árið 2024 settum við okkur markmið um að bæta flokkun matarleifa hjá Brasserie Ósum og því markmiði hefur verið náð. Flokkun og endurvinnsla hjá Parlogis er einnig stór liður í kolefnisbókhaldi samstæðunnar. Frá árinu 2020 höfum við farið úr því að vera með 22% óflokkaðan grófan úrgang niður í 0% og 0% brennslu án orkunýtingar. Árið 2024 erum við komin niður fyrir 1% í urðun.

Sjá hér nánari sundurliðun:

Icepharma og Ósar leggja áherslu á fjarheilbrigðislausnir og velferðartækni til að bæta aðgengi að þjónustu, auka öryggi skjólstæðinga og draga úr umhverfisáhrifum. Með þessum lausnum geta fleiri búið lengur heima við öruggar aðstæður, óháð búsetu, og dregið er úr þörfinni fyrir ferðir heilbrigðisstarfsmanna og skjólstæðinga.

Evondos sjálfvirkir lyfjaskammtarar hafa reynst lykillausn í þessari þróun. Þeir tryggja rétta lyfjagjöf án þess að hjúkrunarfræðingar þurfi að fara á staðinn, sem bætir meðferðarheldni og dregur úr akstri. Nú eru 242 skammtarar í notkun hér á landi og hver þeirra sparar að meðaltali 1,7 heimsóknir daglega.

Samkvæmt greiningu samsvarar þessi fækkun bílferða árlegum samdrætti í kolefnislosun upp á 82,5 tonn af CO₂. Þetta sýnir að snjöll nýsköpun getur bætt þjónustu og dregið úr umhverfisáhrifum – án þess að skerða umönnun.

Ósar hyggjast áfram vera leiðandi afl í þróun heilbrigðislausna framtíðarinnar – með áherslu á sjálfbærni, einföldun og þjónustu sem byggir á þörfum fólks.

Sífellt eru gerðar auknar kröfur til Icepharma og Parlogis þegar kemur að umhverfisþáttum og við viljum gera jafn ríkar kröfur til þeirra aðila sem við veljum að eiga í samstarfi við. Samstarfsaðilar okkar skulu starfa samkvæmt viðeigandi lögum og reglum þegar kemur að umhverfismálum og afar mikilvægt er að samstarfsaðilar okkar þekki umhverfisáhrif starfsemi sinnar og vinni að því með markvissum hætti að draga úr neikvæðum áhrifum hennar á umhverfið.

Þrátt fyrir að vottanir séu ekki fullkomnar má leiða að því líkur að vörur eða þjónusta sem hafa slíka vottun séu ólíklegri en ella að hafa neikvæð áhrif á líffræðilega fjölbreytni. Icepharma vinnur stöðugt að því að auka hlutfall af vörum sem hafa vottun um lífræna eða sjálfbæra framleiðslu.

Ævintýralegur vöxtur Sonett á Íslandi

Á aðeins fjórum árum hefur notkun Íslendinga á lífrænum hreinsiefnum frá Sonett vaxið yfir 300%. Þessi þróun er ekki tilviljun, heldur afleiðing vaxandi meðvitundar meðal neytenda um mikilvægi þess að velja vörur sem hafa jákvæð áhrif á náttúruna og stuðla að sjálfbærni til framtíðar. 

Eitt af stærstu verkefnum Ósa er uppbygging heilsubyggðar á Arnarneshálsi í Garðabæ en þar verða framtíðarhöfuðstöðvar Ósa.

Starfsfólk Ósa og dótturfélaga er lykillinn að því að öll fyrirtæki innan samstæðunnar nái markmiðum sínum, og þar skiptir engu hvort þau markmið séu viðskiptalegs eðlis eða á sviði sjálfbærni og umhverfisverndar. Vinnuumhverfið og þeir umhverfisþættir sem móta það er þannig mikilvægur þáttur þegar horft er til lífsgæða í starfi. Til þess er horft við hönnun á framtíðarhöfuðstöðvum samstæðunnar.

Kortlagning umhverfisþátta í starfsemi Ósa er í stöðugri þróun. Niðurstöðurnar eru skráðar í sérstakt kolefnisbókhald þar sem stuðst er við losunarstaðla frá Umhverfisstofnun fyrir alla þætti nema fyrir hitaveitu og flugsamgöngur. Fyrir hitaveitu er notast við upplýsingar frá Veitum og fyrir flugferðir er notast við reiknivél frá ICAO sem reiknar kolefnislosun flugferða. Með því að skrá áhrif rekstursins á umhverfið getum við séð árangur af þeim aðgerðum sem stuðla að því að lágmarka umhverfisáhrif en einnig óeðlileg frávik sem gerir okkur kleift að bregðast við á ábyrgan hátt. Undanfarin ár hefur verið lögð áhersla á aukna upplýsingaöflun fyrir fleiri losunarþætti undir umfangi 3 og sú vinna heldur áfram næstu ár.